MMAA NKƆMMƆ

 

Me nuabaa, sɛ wote si wo mfeɛ aduonu (20) mu a, mmarima bu wo so sei tam, a wɔn mu dodoɔ no ara pɛ sɛ wɔware wo. Wɔnntoto wo ase koraa. Wo WhatsApp nnya ahomegyeɛ biara, na wo Facebook mpo deɛ yɛnnka - sɛ wohome mpo wɔ hɔ a, nnipa bɛyɛ 400 na wɔkyerɛ anisɔ wɔ ho (likes); na nnipa bɛyɛ 350 na wɔtwerɛ biribi fa ho.

Sɛ wote si kurom a, sɛ mmarima reto wo seesee ara ni. Wo mpokua wɔ ne mmabunu berɛ mu nti ɛhwɛ obiara a ɔgyina w'anim sɛdeɛ ɔyere hwɛ okunu pa anim. W'ano ma ahomeka, na wo nan a ɛsisi fam ne w'anantu twe adwa. Saa berɛ yi, sɛ wo ho yɛ tan mpo a, ɛntumi nna adi esiane sɛ wo honam akwaa nyinaa gyina brane. Saa berɛ yi, wo to tumi bu akyakya woso ma amansan di w'akyi fom kwan.

Me nuabaa, yeinom nyinaa nyɛ bɔne na mmom wonim biribi? Mfomsoɔ a mmaa dodoɔ no ara yɛ no saa berɛ yi ne sɛ:

Wɔtumi gyina nsɛmwa biara so gyae mmarima bi a anka wɔne wɔnom ahyɛ abrabɔ ase. Asɛm ketewa biara a ɛbɛsi wɔ wɔn ayɔnkofa mu no, wɔgyina so ne ɔbarima no gyae. Wɔ wɔn adwene mu no, nam pii wɔ asuom ɛfiri sɛ mmarima bɛyɛ aduonu ne akyire na wɔgyina n'akoma pono akyi rebɔ mu.

Wɔn ani bɛba wɔn ho so no, na mmarima bi a anka wɔmmfata toatire afom wɔn sɛ bratɔ. Ɔbarima biara tumi de n'ano fa wɔn ho de wɔn yɛ hanam ma wɔn se, mpo mmarima a wɔaware! Saa berɛ yi no, ɛnam sɛ mmarima ba mmaa yi abrabɔ mu dabiara no nti, deɛ wɔdwene ara ne sɛ, ɛnyɛ adeɛ a awareɛ ho bɛyɛ den ama wɔn koraa.

Saa berɛ yi, hwee nnhia wɔn. Mmarima ma wɔn nnoɔma a wɔhia biara. Wɔnnyɛ adwuma biara nanso krɛdete mpa wɔn fon so da. Mpaboa, ntaadeɛ, baage, aduhwam ne ade a wɔwɔ mpo wɔnnim ano.

Wɔn abrabɔ yɛ frɔmm, nanso kae sɛ, agorɔ reyɛ dɛ no na adeɛ resa akwantufoɔ. Wɔn ani bɛba wɔn ho so no, na wɔnom mfeɛ ate praka kɔ anim. Afei deɛ wɔbɛhunu ara ne sɛ wɔn mpokua ahyɛ aseɛ resi ne ti ase sɛ ɔpanin a wayi mframabɔne wɔ badwam. Bio, na anka wɔn to akɛseɛ akɛseɛ a na anka wɔn ani gye ho no ahyɛ aseɛ regya wɔn kotodwe yareɛ. Afei na wɔn anim fɛɛfɛ no rehwere n'animuonyam. Wɔbɛhunu sɛ wɔn honam akwaa no nyinaa ahyɛ aseɛ resom wɔn mfeɛ wɔ ahobraseɛ mu. Wɔn yafunu hyɛ aseɛ gye ne ho ma ntaadeɛ mpo mfata wɔn sɛ kane no.

Me nuabaa, nna bɛdane wo abosome ama abosome adane wo mfeɛ. Mpofirim ara, ɔbarima a w'ani da ne so no bɛfiri w'abrabɔ mu prɛko pɛ! Ɛnam sɛ woaso awareɛ nanso wonnwareeɛ nti no, wode ahopere bɛgye ɔbarima foforɔ ato mu, nanso ɔmmfa wo nkɔsi hwee. Mmarima bɛdi w'abrabɔ mu ahyɛmfiri.

Me nuabaa, ɔhaw a onyinikyɛ awoɔ de ba mmaa so bɛpem wo berɛ biara ama adwennwene ama onyini ato akye wo prɛko pɛ. Saa berɛ yi no, na mmarima bebrebe a wogyae wo ho maa wɔn ne wɔn daeɛ no (wɔnom a wɔfiri nnomee abusua mu ne wɔnom a sunsumfi afa wɔn nnɔmum) mfa fon mpo mfrɛ wo bio. Wo nan a na woma so sɛ dwadini bi bodwabodwa, wo sisi a na wonwan no sɛ apawa, koa a na wokoa wo mu sɛ kuntunu, polisi abaa a na wode hyɛ w'anom tafere ho sɛ abelewɔs, ne nnoɔma a na woyɛ no mpa mu ma mmarima no nyinaa bɛtwa mu sɛ sini. Afei nnomee a amanfoɔ yerenom ka guu wo so no bɛbu w'abrabɔ pono ani aba mu! Afei na ɔko no ayɛ honhom mu deɛ - ɛnyɛ anisoɔ bio. Ahonhommɔne a wɔnam mmarima bi so baa w'abrabɔ mu no bɛhyɛ aseɛ ne wo adi asie. Saa berɛ yi no, ahodeɛ a wonya firii wo bra bɔne mu no ntumi nnye wo ɔkwan biara so!

Ɛnya tɔ apɛnten sei a, mmarima a wɔasi wɔn nkɔkorabɔ mu, dodoɔ no mpo aware dada, nko ara na wɔbɛba abɛse wo pɛ sɛ wɔpɛ wo sɛ ɔyere ɛfiri sɛ mmarima a wɔnom ne wo bɔ tipɛn no bɛhunu wo sɛ woanyini kyɛn wɔn, enti sɛ wɔrepɛ mmaa bi aware mpo a, wɔbɛware mmaa a wɔnom mfeɛ no firi 22 kɔsi 28. Kae sɛ, mmaa nyini ntɛm. Yei nti na sɛ ɔbaa nya mfeɛ bɛyɛ 16 a na mmarima mpaninfoɔ mpo gu ne so sɛ adwatɔndeɛ a ɛyɛ fo no; nanso sɛ ɔbarima bi nya mfeɛ 18 mpo a, afoforɔ hunu no sɛ ɔwɔ mfeɛ bɛyɛ 13.

Ɛduru saa berɛ yi a, wopatu de wo bra ma Nyankopɔn prɛko pɛ. Afei wo nsɛm a wotwerɛ wɔ Facebook ne WhatsApp no nyinaa gyina nyamesom ne brapa so. Sɛ mpo obi redi n'awoda a, wo nsɛm a wode bɛma no no fa Yesu Kristo ho. Mpo sɛ w'afɛfoɔ redi bɔɔlbɔ ho nkɔmmɔ a, na wode Yesu din nenam mu. Woyɛ yeinom nyinaa sɛdeɛ ɛbɛyɛ a ɔbarima bi bɛhunu wo sɛ woyɛ ɔbaapa a ɔware wo a wobɛtumi aboa no wɔ abrabɔ mu, nanso onua, woredaadaa wo ho.

Me nuabaa, sɛ ɔbarima nya mfeɛ aduanan a ɔda so yɛ abranteɛ, na mmom, sɛ ɔbaa nya mfeɛ aduasa nnum a, ɔyɛ 'mmaakuo panin'! Ɛdeɛn na mepɛ sɛ mekyerɛ? Deɛ mepɛ sɛ meka nyinaa ne sɛ, ntwɛn mma asuo Tanɔ mfa wo ansa na woasua asudwareɛ, enti hwɛ yie na woanka mehunuiɛ a anka, ɛfiri sɛ ɛyɛ ɔkwasea kasa. Nni mmarima ho agorɔ!

Mo a monnte asɛntia ase no, mennkaa sɛ ɔbaa nya mfeɛ aduasa nnum a ɔnntumi nware. Mennkaa sɛ Onyankopɔn mmerɛ nnyɛ mmerɛ pa. Ɛnyɛ adeɛ a meredi mmaa a wɔanya aboro mfeɛ aduasa a wɔnnwareeɛ ho fɛw. Mennkaa sɛ wɔnom a wɔware berɛ a wɔanya mfeɛ aduonu nnum no na wɔnya awarepa.

Me nuabaa, deɛ mereka nyinaa ne sɛ, mɛnni ahonyadeɛ akyi nsɛe wo mmerɛ, ɛne mmarima nna basabasa wɔ berɛ a wobɛtumi anya ɔbarima bi ne no atena abɔ bra. Berɛ biara no, kae hunu sɛ, ahonyadeɛ biara a ɛnnɛ worepere wo ho anya no nnɛ no bɛdane sumina so adeɛ ɔkyena.

Meda wo ase sɛ woanya berɛ akenkan me nsɛm yi. Sɛ ɔdomfoɔ no dom yɛn da foforɔ a, ka me ho na yɛmmɔ *Mmarima Nkɔmmɔ.

Me din de Ghanaba Kwabena Amanseɛ. Mekyerɛ adeɛ wɔ Yaa Asantewaa Mmaa Ntoasoɔ Sukuu mu wɔ Kumase Tanɔso.

Wonso wobɛ tumi de wo atwerɛsɛm anaa article asende asarebee11@gmail.com na y'atwerɛ agu yen website so ha.